درسیمی اینگیلیستاندا قورتاریب کندیمیزه گلنده قونوم - قونشودان و دوست - آشنادان علاوه کندخودا دا گؤروشومه گلدی. آنجاق کندخودا بیر آز گئجیکمیشدی. آخی او بیریسیلردن فرقلنمک ایسته‌ییردی. او گلنده آرتیق آخشام چاغی ایدی و آنامدان باشقا ائوده بیر کس یوخ ایدی. آنام دا کی، یازیق آرواد یاشماغینی برکیدیب کئچدی دهلیزه. کندخودانی قارشیلادیم:
- آی السلامو علئیکوم، آی خوداحافظ، احوال شریف، عناصر لطیف، ماشاللاه، ماشاللاه اخویزاده، نئچه مدتدی منتظر وجود ذیجودون و مشتاق دیدارون ایدیم. انشاللاه ذات عالی‌نین مجاز موبارکی سالیمدیر!
- بو نئجه آنا دیلیدیر کی، آنا باشا دوشمور؟!
کلمات کلیدی:
بیر طرفدن دانیشگاه آزادین خرجی، بیر طرفدن بانکین قیسطی، بیر طرفدن باهالیق... دوزون‌آختارسانیز قانیم قارالمیشدی. اؤز - اؤزومه دوشونوردوم کی، «آده، بئله ده دؤولت اولار؟». ائله همین‌باشلیقدا بیر موزالان یازماق قرارینا گلدیم. کوچه‌یه چیخدیم. چیله‌مه قار یاغمیشدی. بیر اوغلان‌اوشاغی مکتبدن گلیردی. اؤزون اؤلدورسه‌یدی بئشینجی صینیف شاگردی اولاردی. منی گؤرمک همن دردی دئشیلدی:
- عمی، تعطیل ائله‌مه‌دیلرآ!
عمی‌دن سس چیخمادی. سؤزونو داوام ائتدیردی:
- جهنمه ائله‌سینلر، گورا ائله‌سینلر. بیر ایکی نفر ییخیلیب باشی پارتلایار، اوننان دئیه‌رم گئت.
یئنه عمی‌دن سس چیخمادی. بو دفعه اؤز - اؤزونه دانیشیرمیش کیمی دئدی:
- بئله ده دؤولت اولار؟
********
خط ماشینینا میندیم. شریعتی‌ده دوشه‌جکدیم، هئچ اؤزوم ده بیلمه‌دن «سرعین ایسقاسی»ندا دوشدوم. ایکی اوچ نفر اللرینده کوره‌ک بیر - بیرلری ایله دانیشیردیلار.
بیرینجیسی:
- دئیه‌سن قار کسیلدی.
ایکینجیسی:
- قار کسیلمه‌دی، چؤره‌ییمیز کسیلدی!
اوچونجوسو:
- یاریمجا مئتر یاغسایدی...
دوردونجوسو:
- گؤر یاغماییب.
بئشینجیسی:
- بئله ده دؤولت اولار؟
********
گئتدیم تزه‌میدانا، کندلیمیزین چایخاناسینا. کندلیلریمیزین کئفی ... دادی وئریردی. سؤز یئرآلماسیندان گئدیر و کیمین کیمله دانیشدیغی دا بللی دئییلدی.
- آده حاجی‌خودو، او سن اؤله‌سن بو یاشا گلمیشم باشیما بئله بؤرک کئچمه‌ییب. آنبارین یاریسین‌سویوق آلیب. جدین حاققی بو بئش - اون ایلین قیشی ماخلوغو آلدادیب. آده بورا هازیربئجاندیر ائی، هازیربئجان. هاواسینین ایپی‌نین اوستونه اودون ییغانین آغلی یوخدور.
- کالبا خالیق، گئتدیگیم بئیته آند اولسون بولارین هامیسینا دئدیم. سؤزه باخان وار؟ به‌یم بؤیوک - کیچیک قالیب؟
اونلارا ماددیم - ماددیم باخان دیشی عوض منی کیرتینه سالیب دئدی:
- سن بیزدن چوخ بیلرسن، بئله ده دؤولت اولار؟
چایخانادان چیخدیم. بیر نفر ماشینین قاپیسینی آچیب مینمک ایسته‌دیکده آیاغی سوروشدو ومؤحکم ییخیلدی. جاماعات دؤوره‌سینی آلدی. اونلاردان بیری:
- آقای شمسایی بیر شئی اولمادی کی؟
حرصیندن دیشی بوغارساغینی کسن شمسایی اونا جاواب وئرمک عوضینه دئدی:
- بئله ده دؤولت اولار؟
********
ائوه قاییداندا همکارلاردان بیرینه راست گلدیم. لاپ قدیم اردبیللی‌لردن ایدی. بیلیرسیز ده‌ه‌ه،اونلارلا دانیشاندا مخصوص سؤزلردن استفاده ائله‌مه‌لی اولورسان. مثلا «حالوز نه‌جوردی»، «خسته‌اولمیاسوز»، خانوم بچه‌لر نه جوردی؟ « بؤیوکلوگوزی یئتیررم»، «ابه‌وی»، «والیده»، «صبیه»،«بنده‌زاده» و... منیم نه‌ییم اونلاردان اسکیکدیر - دئیه باشلادیم:
- خسته اولمیاسوز.
- ساغ اولوز!
- والیده‌لر یاخشیدی؟
- سلامی وار.
- بؤیوکلیگوزی یئتیررم.
- ابه‌ویلر نه جوردی؟
- جزوی فوت ائله‌ییب!
-
-
-
نهایت منه دئدی:
- آی باشینا اللی مینه احتیاجیم وار.
باخیشیمدان اؤزو ده بیلدی کی، اللی مین تومن سهلدیر، اللی قیران دا یوخومدور. سون سؤزونودئییب آیریلدی:
- بئله ده دؤولت اولار؟
کلمات کلیدی:
