آتاسینین صاباح شهره گئده‌جه‌ییندن هامیدان چوخ خودو سئوینیردی. بؤیوک بیر ارک یانالیق و یالواریش ایفاده‌سیله آتاسیندان ایسته‌میشدی اونا توتک آلسین. آخی آرتیق بؤیوموشدو و بو ایل قویونلارینی اؤزو اوتاراجاقدی. او، دفعه‌لرله اؤزوندن سوروشموشدو کی، توتک‌سیز قویون اوتارماق اولارمی؟ سونرا اؤز سؤالینا اؤزو جاواب وئرمیشدی: البته اولماز! چای قیراغیندا اوتوروب بلله‌سینین بیر تیکه‌سینی اؤزو یئییب، بیر تیکه‌سینی ده قاباغیندا شؤنگویوب گؤزلرینی اونا دیکن داغباسانا آتا- آتا اؤز- اؤزونه دوشونموشدو کی، آللاه ائله‌مه‌میشکن جاناوار گلسه داغباساندان چوخ توتکدن قورخوب قویونلارا سوخولمایاجاخ. حتی بو گئجه یاتاقدا گؤزلرینی یومانا کیمی «توتک یادیندان چیخماسین» دئیه آتاسینا تاپشیرمیشدی. دونن آخشامچاغی آناسینا خبردارلیق دا وئرمیشدی:
- من نئینیم، توتک آلماساز، قویونلاری جاناوار یئسه تاقصیر اؤز بوینوزادیر.
دئمک آتاسی شهردن توتک‌سیز قاییتسایدی، عؤمرونون سونونا کیمی باغیشلانمایاجاقدی.
آرواد ایکی اوچ آناجین قیچلارینی باغلاییب اولاغین اوستونه قویدو و «گئت، آللاها تاپشیردیم» دئییب یولا سالماق ایسته‌ینده دورناخالا الینده بیر فئره حیه‌ط قاپیسیندان ایچه‌ری گیردی:
- باشووا دؤنوم آی حه‌تم‌قاغا، بونو وئررسن بیر آز اییده، بیر آز دا چاینان کیشمیش آلارسان. کیشی‌نین چایخورلوغو بیزی دیرلیکدن سالیب.
ماهی قیمیشا ـ قیمیشا دورنایا ساتاشدی:
- یاخشی ائله‌ییب دئمیرسن، او قدر گؤزو گؤتورمه‌ین وار کی،
- آی باجی، نه‌یین دئیه‌جی‌یم، قیزین دا دئمه‌یی وار؟
- ویی باشیما خئییر، نه اولسون کی، آللاها آجیق گلر. بو دؤنه قیزی اولوب، گلن دؤنه ده آللاه اوغول وئرر.
دورناینان ماهی‌نین دانیشیغی هله بو تئزلیکده قورتاراسی دئییلدی. حه‌تم فئره‌نی اونون الیندن آلیب اولاغین اوستونه قویدو و قاپیدان چیخدی. «به‌ده‌ل‌یولو» تامامیله امین- آمانسیزلیق ایدی. او گونلر هر بیر کولون دیبینده نئچه اوغرو پوسوردو. بیر هفته بوندان قاباق یازیق بهری‌نین نه‌یی وار ایدیسه الیندن آلیب یولا سالمیشدیلار. ظالیملار اگنی‌نین پالتاریندان دا کئچمه‌میشدیلر. سلمی‌خالا، «یئنه آدامین اؤزونو اؤلدورمورلر، سئوینین» دئمیشدی.
نه ایسه، حه‌تم اولاغین آغزینی «یئکه‌لی»یه طرف یؤنه‌لتدی.
«گیلاندو»وو کئچیب پوچت یولونا یئتیشنده آرخایینلاشدی. کؤکسونو اؤتوروب آلاجاغی شئیلری بیر داها بئینینه حک ائتدی. خودونون توتهیی هامیسیندان اولده ایدی. «ته‌کی درد بیر دنه توتک دردی اولسون. اونا بونا یالوارماقدان اوزومون سویو تؤکولوب...» دئیه اؤز - اؤزونه دوشوندو و «آخیر کی، یونجا بیتدی، اؤکوزوم اؤلمه‌دی» ایفاده‌سینی آز قالا اوجا سسله دئمک ایسته‌ییردی.
حه‌تم خوش بیر احوال روحیه ایله گیلاندو کؤرپوسونو کئچیب «سالتاوار» تورشونا یئتیشدی. هله ده اؤز عالمینی‌سئیر ائدیردی: «خودوبالام صاباح قویون اوتارماغا گئده‌جک. ائه، بیر دلی شئیطان دئییر یاریم چه‌رک «آغایی» آل آخشاما سودلو پلو بیشیرک، جهنمه کی...» بیردن، «کیشی کارسان؟ ساخلا گؤروم»، سسی اونو سئر ائتدیگی دونیادان آییردی. قاباغینی ایکی نفر الی «بئرنوو»لو شایسه‌ون کسمیشدی، آمما وضعیتین نه یئرده اولدوغونو بیلمیردی. «اشکارلیق» دؤورو هله ده یادینا دوشموردو. اودور کی، اؤزونو ایتیرمه‌دن اولاغی ساخلاییب دئدی:
- نه دئییرسیز بالا؟
- هارا گئدیرسن؟
- گؤرموسوز، شهره گئدیرم ده‌ه‌ه. ائوه آیین - اویون آلماغا.
- هانسی کندلی‌سن؟
- «یئیجه»لی.
شایسه‌ونلر حه‌تمی اله سالماغا باشلادیلار:
«یئیجه‌لی، قودوغو اؤلر دینجه‌لی».
هله ده هئچ زاد سئزمه‌ین حه‌تم دیللندی:
- باشووا دؤنوم، دده‌ن یئرینده‌یم، نیه اله سالیرسیز؟
شایسه‌وه‌نین بیری حه‌تمی یاخالادی:
- کس سسینی ایت اوغلو ایت. گؤر اوزون نه ده تولکولویه ووروب...
او بیری شایسه‌ون آجیقلی بیر ایفاده ایله دئدی:
اویونون اؤیرنمه‌میش داغاللیغین اؤیره‌نیر ولدالزنالار. بس به‌ده‌ل یولوینان نیه گئتمیرسن؟
کلمات کلیدی:
