من کامپیوتئرده یازیرام.
آرواد ات ماشینی ایله ات چه‌کیر.
اوشاقلاردان بیری درسینی اؤیره‌نیر!
اوشاقلاردان ایکیسی ده تئلئویزیونا باخیر.
کامپیوتئرین دوگمه‌لری‌نین تیققیلتیسی، درس اوخویان اوشاغین واراقلادیغی کاغیذلارین خیشیلتیسی، تئلئویزیونا باخان اوشاقلارین هانسی کانالا باخماق اوستونده دالاشماسی ائوده قولاغین آلیشدیغی ریتمیک سس یاراتمیشدیر. هردن بیر ات ماشینی‌نین قیژیلتیسی اونو پوزور.
بیر آنلیغا ائوه سکوت چؤکور و درحال معین ایفاده‌لرله پوزولور:
من: «وای‌ی‌ی»!
درسینی اؤیره‌نن اوشاق: «ائه‌ه‌ه»!
تئلئویزیونا باخان اوشاقلار: «یاخشی اولدو»!
آرواد: «گؤزوزون یئری قالسین»!
یئنه سکوت چؤکور و یئددی- سککیز دیقه‌لیک داوام ائدیر.
همیشه دیله گلن سؤزلر، قارغیشلار بو دفعه یالنیز بئیین جیغیرلاریندا وار-گل ائله‌مه‌یه باشلاییر:
من: «اختیارین وئره‌لر... فقط سوروشاسان نیه... واللاه اولماماغی اولماغیندان یاخشیدیر»...
درسینی اؤیره‌نن اوشاق قلمی مؤحکم کتابین اوستونه چیرپیر.
تئلئویزیونا باخان اوشاقلارین بیری: «یاخشی ائدیرلر! پیشیکنن سیچانین کارتونونا باخماساق گونوموز چیخماز! هه، ایندی باخ...»
او بیریسی: «هله سن فوتبالا باخ گؤروم»
آرواد: «باخان یوخدو ده‌ه...یوخسا...»
بیردن هامی عینی بیر نتیجه‌یه یئتیشیر و سکوت پوزولور.
هامی بیردن:
- باری بیر زنگ ائله‌یین!
تئلئفونا ساری گئدن اولمور. یالنیز هامیدان کیچیگیمیز دیلله‌نیر:
- آماندی زنگ ائله‌مه‌یین. بیلسه‌لر قارانلیقدا قالمیشیق باغیرلاری چاتلایار!
آرواد:
- نئینه‌سینلر، چاتیشمیر ده‌ه.
یئنه سکوت.
منیم فیکریم بئش- اون گون بوندان قاباغا گئدیر...
تئلئویزیوندا تیزئر شکلینده وئریلن بیر اعلانی خاطیرلاییرام:
«قویولاردان سو چکمک اوچون قازوئیلله ایشله‌ین موتور عوضینه ائلئکتریک موتورلاردان استفاده ائتسک.... ائنرژی‌نین هده‌ره گئتمه‌سی‌نین قارشیسی آلینار».
تئلئفونا جوموب اوجویا زنگ ائله‌ییرم:
- آی اوجو! بیر طرفدن برق چاتیشمیر، بیر طرفدن ده دئییرلر گلین سو موتورلارین دا برقی ائله‌یین. آخی بو نه ایشدی؟
اوجو فیکیرلشمه‌دن جاواب وئریر:
- دوز یولدا یئریه بیلمه‌ین شوخومدا شیللاق آتار!
کلمات کلیدی:
حه‌تم «باشووا دؤنوم، آخی به‌ده‌ل یولو اوغرو- موغروینان دولودور. اوردان گئتمک اولار؟» دئمک ایسته‌ینده بیردن هر شئیی باشا دوشدو. بئینینه ووردو کی، به‌هرینین ده آجیغینی بونلاردان چیخسین. ایکیسینه گوجو چاتمایاجاغینی، اولاغی یوکو ایله ایتیره‌جه‌یینی و داها باشلیجاسی خودونون توتکسیز قالاجاغینی خاطیرلاییب‌آجیغینی بیر ته‌هر اوددو. اؤزونو اله آلیب دئدی:
- باشوزا دؤنوم، منه گؤره قوللوغوز؟
- یوکون نه‌دی؟
- یاغ - پئندیر.
شایسه‌وه‌نین بیری اولاغین اوستونده‌کی یوکو آرادیقدان سونرا یولداشینا دئدی:
- دوز دئییر، آمما یئمه‌لی تویوغو دا وار آآآ.
حه‌تمین اوره‌یی بیر آز یئرینه گلدی. اؤز - اؤزونه، «ایت آپاران اولسون، بیر آز یاغدان پئندیردن وئریب سوووشارام» دئدی و دؤرد لاواشین آراسینا بیر چالخام یاغ، بیر ایکی دیلیم پئدیر قویوب دئدی:
- آلین، یئیرسیز، حالالیز اولسون، اؤز راضیلیغیملا وئریرم.
شایسه‌ونلر گولوشدولر:
- آللاه کؤمه‌یین اولسون، یاخشی کی، حالال ائدیرسن، یوخسا بوغازیمیزدان گئتمز!
هر شئی اؤز قایداسیندا گئدیردی. بیر قولدورا چاپیلان آدام او گون مقصده کیمی امین- آمانلیقدا اولمالی ایدی. چونکی آیری بیر قولدورون اونا ساتاشماسی اولکی قولدورو تحقیر ائله‌مک حساب
اولونوردو.
قولدورلارین بیری آلدیغی یاغ - پئندیری یئکه بیر دسمالا باغلادی. او بیریسی‌نین گؤزو سبدین ایچینده سامان آراسیندا سلیقه ایله یئرلشدیریلمیش یومورتالارا دوشدو. فیکریندن نه ایسه کئچدی و یولداشینا دؤندو:
- یومورتالاردان یاخشی نیشانا اولار آآآ.
- دوز دئییرسن کئچل.
اونلار یومورتالاری سبددن چیخاریب اللی مئترلیکده سیرا دوزدولر. بیری او باشدان، بیری ایسه بو باشدان وورماغا باشلادیلار. گولله‌لر یومورتالارین هامیسینی تورپاق کیمی سوووردو.
حه‌تمین گؤزلریندن یاش سوزولوردوسه ده یاغ پندیرین قالانی ایله تویوقلاری ساتیب بیر آز آیین - اویون و البته خودویا توتک آلا بیله‌جه‌یینه گووه‌نیردی. بلکه ده اولاغی سوروب یولونو داوام ائتدیرسئیدی، قولدورلارین ایشی اولمایاجاقدی. آمما حه‌تم دایانیب اونلارین اجازه‌سینی گوددو. قولدورلار یئنه اولاغا ساری گلدیلر. بیری او بیریسینه‌دئدی:
- ایه کئچل، گلسنه تویوقلاردان بیرینی گؤتوروب دیشیمیزی ده‌ییشک؟
- بس نه‌ه‌ه.
حه‌تم اؤزو آناجین بیرینی آچیب وئرمک ایسته‌دی. آمما آرتیق ایش ایشدن کئچمیشدی. شایسه‌ون فه‌ره‌نی گؤتورموشدو. حه‌تم اونا یاخینلاشیب فه‌ره‌نی آلدی و دئدی:
- باشووا دؤنوم، بو آماناتدی، آناجلاردان بیرینی گؤتور.
اونون بو داورانیشی شایسه‌ونه خوش گلمه‌دی:
- آده، قانجیغین بالاسی قانجیق، اوتانمیرسان؟ فه‌ره‌نی الیمدن
آلیرسان؟
- قادان اوره‌ییمه، آخی بو آماناتدی. وئره بیلمه‌رم. آناجلارین لاپ ایکیسین ده گؤتور، سنین اولسون.
- ویی، کیشیده اوزه باخ، سن آللاه! بس منیم دؤیو سنیندی؟
حه‌تمین دیشی بوغارساغین کسیردی. آماناتا خیانت ائتمه‌یی غیرتینه سیغیشدیرا بیلمزدی. سون سؤزونو دئمه‌لی‌ایدی:
-اؤلدورسن ده فه‌ره‌نی وئره بیلمه‌رم!
قولدور بئرنووو قاریشدیردی و حه‌تمی نیشان آلدی:
- آت یئره فه‌ره‌نی، اؤزون ده گل آیاغیمنان اؤپ. یوخسا گونا هیندان کئچمه‌رم.
- من آماناتا خیانت ائده بیلمه‌رم.
او بیریسی قولدور دیللندی:
- ایه کئچل، بیر گولـله چاخ بئینینه، گؤرک آخماق آداملار نه‌جور جان وئریر.
قولدورون بارماغی قورخولوغون ایچینده ته‌تییه ایلیشدی و...
حه‌تم قیوریلیب ییخیلدی. سودان چیخاریلان بالیق کیمی چابالاماغا باشلادی. هله ده فه‌ره‌نین قیچلارینی اووجونون ایچینده برک - برک سیخمیشدی. قولدور فه‌ره‌نی اونون الیندن چیخارماق ایسته‌دی، آمما ممکن اولمادی. یولداشینا دؤندو:
- ایه کئچل، او سن اؤله‌سن بو تاتلاردا لاپ ایت جانی وار.
گولـله قارنیندان ده‌ییب کوره‌یینین اورتاسیندان چیخمیشدی. کئچیردیگی بوتون گونلر بئینینده جانلانماغا باشلادی.
تای- توشلاری، آتا- آناسی، حتی ماهی ایله ائولنمه‌سی و اوشاقلاری‌نین، البته خودونون اولماسی بئله بعضاً سیرا ایله، بعضاَ ایسه قاریشیق شکیلده گؤزونون اؤنوندن سوووشوردو. قان گئتدیکجه بئینینده تجسم ائتدیردیگی آداملار و اشیالار یاواش- یاواش کوبود فیقورلارا دؤنوردو. سون گوجونو توپلاییب گؤزلرینی یازسماسینا دیکدی و فه‌ره‌نین قیچلارینی مؤحکم توتموش بارماقلاری آچیلدی.
شایسه‌ون اگیلیب فه‌ره‌نی گؤتورنده گؤزلری حه‌تمین گؤزلرینه ساتاشدی. آرتیق دونیادا هئچ نه‌یی گؤرمه‌ین او گؤزلرین درینلیگینده حک اولونموش سونسوز نیفرت قولدورو سارسیتدی. انسانی تویوق قدر سایا سالمایان شایسه‌وه‌نین بدنینه اسمه‌جه دوشدو. یولداشی اونون وضعیتینی گؤروب، «ایه، سنده سرچه اوره‌یی ده یوخموش کی»، دئییب مئییتی آغزی اوسته دؤندردی...
قویونلار نه‌دنسه اورکدو و قیچلارینی یارغاندان ساللاییب اوتوران اون اوچ یاشلی خودو او گوندن دوز آلتی ایل اوزاقلاشدی. بالیقلی کوکره‌ییردی. یاز هاواسیندان سرخوش اولموش بیر سیچان یوواسینین قاباغیندا ائشه‌نک آتیردی. ساوالانین اته‌یینده‌کی قار یاز گونه‌شینه تسلیم اولماق ایسته‌میردی. کؤرپه قوزو سون درجه ائهتیراسلا آناسینی امیردی و خودونون «امام‌قوشو» دئیه سون درجه سئودیگی توراغایلار اوخوشا- اوخوشا یازین ماوی‌سماسینا هوپوردولار...
کلمات کلیدی:
آتاسینین صاباح شهره گئده‌جه‌ییندن هامیدان چوخ خودو سئوینیردی. بؤیوک بیر ارک یانالیق و یالواریش ایفاده‌سیله آتاسیندان ایسته‌میشدی اونا توتک آلسین. آخی آرتیق بؤیوموشدو و بو ایل قویونلارینی اؤزو اوتاراجاقدی. او، دفعه‌لرله اؤزوندن سوروشموشدو کی، توتکسیز قویون اوتارماق اولارمی؟ سونرا اؤز سؤالینا اؤزو جاواب وئرمیشدی: البته اولماز! چای قیراغیندا اوتوروب بلله‌سینین بیر تیکه‌سینی اؤزو یئییب، بیر تیکه‌سینی ده قاباغیندا شؤنگویوب گؤزلرینی اونا دیکن داغباسانا آتا- آتا اؤز- اؤزونه دوشونموشدو کی، آللاه ائله‌مه‌میشکن جاناوار گلسه داغباساندان چوخ توتکدن قورخوب قویونلارا سوخولمایاجاخ. حتی بو گئجه یاتاقدا گؤزلرینی یومانا کیمی «توتک یادیندان چیخماسین» دئیه آتاسینا تاپشیرمیشدی. دونن آخشامچاغی آناسینا خبردارلیق دا وئرمیشدی:
- من نئینیم، توتک آلماساز، قویونلاری جاناوار یئسه تاقصیر اؤز بوینوزادیر.
دئمک آتاسی شهردن توتکسیز قاییتسایدی، عؤمرونون سونونا کیمی باغیشلانمایاجاقدی.
آرواد ایکی اوچ آناجین قیچلارینی باغلاییب اولاغین اوستونه قویدو و «گئت، آللاها تاپشیردیم» دئییب یولا سالماق ایسته‌ینده دورناخالا الینده بیر فئره حیه‌ط قاپیسیندان ایچه‌ری گیردی:
- باشووا دؤنوم آی حه‌تم‌قاغا، بونو وئررسن بیر آز اییده، بیر آز دا چاینان کیشمیش آلارسان. کیشی‌نین چایخورلوغو بیزی دیرلیکدن سالیب.
ماهی قیمیشا ـ قیمیشا دورنایا ساتاشدی:
- یاخشی ائله‌ییب دئمیرسن، او قدر گؤزو گؤتورمه‌ین وار کی،
- آی باجی، نه‌یین دئیه‌جی‌یم، قیزین دا دئمه‌یی وار؟
- ویی باشیما خئییر، نه اولسون کی، آللاها آجیق گلر. بو دؤنه قیزی اولوب، گلن دؤنه ده آللاه اوغول وئرر.
دورناینان ماهی‌نین دانیشیغی هله بو تئزلیکده قورتاراسی دئییلدی. حه‌تم فئره‌نی اونون الیندن آلیب اولاغین اوستونه قویدو و قاپیدان چیخدی. «به‌ده‌ل‌یولو» تامامیله امین- آمانسیزلیق ایدی. او گونلر هر بیر کولون دیبینده نئچه اوغرو پوسوردو. بیر هفته بوندان قاباق یازیق بهری‌نین نه‌یی وار ایدیسه الیندن آلیب یولا سالمیشدیلار. ظالیملار اگنی‌نین پالتاریندان دا کئچمه‌میشدیلر. سلمی‌خالا، «یئنه آدامین اؤزونو اؤلدورمورلر، سئوینین» دئمیشدی.
نه ایسه، حه‌تم اولاغین آغزینی «یئکه‌لی»یه طرف یؤنه‌لتدی.
«گیلاندو»وو کئچیب پوچت یولونا یئتیشنده آرخایینلاشدی. کؤکسونو اؤتوروب آلاجاغی شئیلری بیر داها بئینینه حک ائتدی. خودونون توتهیی هامیسیندان اولده ایدی. «ته‌کی درد بیر دنه توتک دردی اولسون. اونا بونا یالوارماقدان اوزومون سویو تؤکولوب...» دئیه اؤز - اؤزونه دوشوندو و «آخیر کی، یونجا بیتدی، اؤکوزوم اؤلمه‌دی» ایفاده‌سینی آز قالا اوجا سسله دئمک ایسته‌ییردی.
حه‌تم خوش بیر احوال روحیه ایله گیلاندو کؤرپوسونو کئچیب «سالتاوار» تورشونا یئتیشدی. هله ده اؤز عالمینی‌سئیر ائدیردی: «خودوبالام صاباح قویون اوتارماغا گئده‌جک. ائه، بیر دلی شئیطان دئییر یاریم چه‌رک «آغایی» آل آخشاما سودلو پلو بیشیرک، جهنمه کی...» بیردن، «کیشی کارسان؟ ساخلا گؤروم»، سسی اونو سئر ائتدیگی دونیادان آییردی. قاباغینی ایکی نفر الی «بئرنوو»لو شایسه‌ون کسمیشدی، آمما وضعیتین نه یئرده اولدوغونو بیلمیردی. «اشکارلیق» دؤورو هله ده یادینا دوشموردو. اودور کی، اؤزونو ایتیرمه‌دن اولاغی ساخلاییب دئدی:
- نه دئییرسیز بالا؟
- هارا گئدیرسن؟
- گؤرموسوز، شهره گئدیرم ده‌ه‌ه. ائوه آیین - اویون آلماغا.
- هانسی کندلی‌سن؟
- «یئیجه»لی.
شایسه‌ونلر حه‌تمی اله سالماغا باشلادیلار:
«یئیجه‌لی، قودوغو اؤلر دینجه‌لی».
هله ده هئچ زاد سئزمه‌ین حه‌تم دیللندی:
- باشووا دؤنوم، دده‌ن یئرینده‌یم، نیه اله سالیرسیز؟
شایسه‌وه‌نین بیری حه‌تمی یاخالادی:
- کس سسینی ایت اوغلو ایت. گؤر اوزون نه ده تولکولویه ووروب...
او بیری شایسه‌ون آجیقلی بیر ایفاده ایله دئدی:
اویونون اؤیرنمه‌میش داغاللیغین اؤیره‌نیر ولدالزنالار. بس به‌ده‌ل یولوینان نیه گئتمیرسن؟
کلمات کلیدی:
